សមាគមសម្ព័ន្ធអ្នកសារព័ត៌មានកម្ពុជា

សហជីពគាំទ្ររដ្ឋាភិបាលចោទអង្គការការពារសិទ្ធិកម្មករពីបទញុះញង់សមាជិកខ្លួនឱ្យបង្កើតសហជីពថ្មី

លោក មឿន តុលា នាយកប្រតិបត្តិអង្គការ CENTRAL ថ្លែងក្នុងសន្និសីទកាសែតអំពីបញ្ហាកូដកម្មរបស់បុគ្គលិកកាស៊ីណូណាហ្គាវើលដ៍ កាលពីថ្ងៃទី២៩ ខែសីហា ឆ្នាំ២០២២។ ខេមបូចា/អួន ឈិន
លោក មឿន តុលា នាយកប្រតិបត្តិអង្គការ CENTRAL ថ្លែងក្នុងសន្និសីទកាសែតអំពីបញ្ហាកូដកម្មរបស់បុគ្គលិកកាស៊ីណូណាហ្គាវើលដ៍ កាលពីថ្ងៃទី២៩ ខែសីហា ឆ្នាំ២០២២។ ខេមបូចា/អួន ឈិន

តំណាងសហភាពសហជីព និងសហព័ន្ធសហជីពប្រមាណ២០០ បានចោទប្រកាន់អង្គការការពារសិទ្ធិកម្មករឯករាជ្យដ៏លេចធ្លោចំនួនពីរ ថាបានញុះញង់សមាជិករបស់ខ្លួនឱ្យចាកចេញ និងបង្កើតសហជីពថ្មី។ ការអះអាងនេះត្រូវបានបដិសេធ ដោយអង្គការមួយក្នុងចំណោមពីរដោយបានលើកឡើងថាខ្លួនមិនដែលបានបណ្តុះបណ្តាលសមាជិកនៃសហជីពហត្ថលេខីណាមួយក្នុងញត្តិនោះទេ ដែលភាគច្រើនជាសហជីពមានទំនាក់ទំនងជាមួយរដ្ឋាភិបាល ឬគណបក្សកាន់អំណាច។

លិខិតពីរផ្សេងគ្នាត្រូវបានផ្ញើនៅថ្ងៃចន្ទទី២៨វិច្ឆិកាទៅកាន់មជ្ឈមណ្ឌលអាមេរិកសម្រាប់សាមគ្គីភាពការងារអន្តរជាតិ (ACILS) និងមជ្ឈមណ្ឌលសម្ព័ន្ធភាពនិងសិទ្ធិមនុស្ស (CENTRAL) ដោយចោទប្រកាន់ថាអង្គការទាំងពីរបំបែកសាមគ្គីភាពក្នុងចំណោមសមាជិកសហជីពរបស់ពួកគេ។ ក្នុងលិខិតនោះ ភាគីហត្ថលេខីបានអះអាងថា ក្នុងអំឡុងពេលបណ្តុះបណ្តាលដែលរៀបចំដោយ CENTRAL និង ACILS តំណាងសហជីពត្រូវបានជំរុញឱ្យចាកចេញពីសហជីពរបស់ពួកគេ ហើយបង្កើតសហជីពថ្មី ដោយត្រូវបានសន្យាថានឹងមានការគាំទ្រផ្នែកបច្ចេកទេស និងហិរញ្ញវត្ថុ។

ញត្តិនោះ បានសរសេរថា៖ «យើងទាំងអស់គ្នាកំពុងបន្តតាមដានយ៉ាងយកចតិត្តទុកដាក់ខ្ពស់បំផុត ចំពោះសកម្មភាពរបស់ CENTRAL ហើយប្រសិនបើគ្មានការបញ្ឈប់នូវចេតនាទុច្ចរិតទេ យើងទាំងអស់នឹងចាត់វិធានការហ្មត់ចត់ ដោយប្តឹងទៅក្រសួង និងអាជ្ញាធរពាក់ព័ន្ធ»។ ញត្តិដដែលបានបន្តថាករណីនេះធ្វើឱ្យអំណាចសហជីពចុះខ្សោយ និងប៉ះពាល់ដល់ការការពារនិយោជិក។

លោក សួង ហួត ប្រធានសភាសម្ព័ន្ធសហជីពជាតិកម្ពុជា (NACC) ដែលបានចុះហត្ថលេខាលើញត្តិនោះបានប្រាប់ខេមបូចាថាលិខិតនោះមានគោលបំណង៖ «គ្រាន់តែជាការព្រមានសម្រាប់អង្គការទាំងនោះពិចារណាឡើងវិញ»។

លោក​បដិសេធ​មិន​ផ្តល់​ភស្តុតាង​ដែល​ថា​អង្គការទាំងពីរបាន​ប្រើយុទ្ធសាស្រ្តបែបណាដើម្បីអូសទាញសមាជិកសហជីពរបស់លោកនោះទេ ដោយ​លោកបាននិយាយ​ថាសហជីព​កំពុងតែ​ប្រមូល​ភស្តុតាង​ដើម្បី​ចែក​រំលែក​ដល់​សាធារណជន។

លោកបានបន្តថា៖ «ខ្ញុំ​មិន​ទាន់​អាច​ផ្តល់ភស្តុតាង​នេះបាន​នៅ​ឡើយ​ទេ។ ប៉ុន្តែ​សម្រាប់​ឯកសារ និង​ភស្តុតាង​យើង​បាន​រក​ឃើញ​មាននៅ​ក្នុង​ដៃហើយ ខណៈ​ដែល​ក្រុម​ការងារក៏កំពុង​ប្រមូល​បន្ថែម​ទៀត»

អ្នកស្រី ទេព គឹមវណ្ណារី ប្រធាន​សហភាព​សហជីពកម្ពុជា​ជាហត្ថលេខីក្នុងញត្តិនោះដែរ បាន​បន្ទរ​ការ​អត្ថាធិប្បាយ​របស់​លោក ហួត ដោយ​ថា វគ្គ​បណ្តុះបណ្តាល​ដែល​រៀបចំ​ដោយ ACILS និង CENTRAL ជា​ទៀងទាត់​នាំ​ឱ្យ​មាន​ការ​ប្រេះឆា​ក្នុង​ចំណោម​សហជីពរបស់ខ្លួន។

អ្នកស្រីបានថ្លែងថា​៖ «ខ្ញុំ​មិន​ដឹង​ថាប៉ុន្មានទេ [សមាជិកសហជីពដែល​ត្រូវ​បាន​គេ​បញ្ចុះបញ្ចូល] ខ្ញុំ​មិន​ដឹង​ទេ។ ប៉ុន្តែ​ភាគច្រើន​ដូច​បន្ទាប់ពី [​មន្ត្រីសហជីព​] ត្រឡប់​មកពី​វគ្គ​បណ្តុះបណ្តាល​វិញ វា​មាន​បញ្ហា​នៃ​ការបែកបាក់​គ្នា​»​

អ្នកស្រីបាននិយាយថាមិនដឹងថាមានមនុស្សប៉ុន្មាននាក់ដែលត្រូវបានបញ្ចុះបញ្ចូលឱ្យបង្កើតសហជីពថ្មី ឬក៏មិនដឹងដែរការបញ្ចុះបញ្ចូលបែបនេះកើតឡើងនៅពេលណានោះទេ ដោយអ្នកស្រីបានបន្ថែមថាអ្នកស្រីគ្រាន់តែដឹងថាមានការប្រេះឆាក្នុងក្រុមបន្ទាប់ពីពួកគេត្រឡប់មកពីចូលរួមវគ្គបណ្តុះបណ្តាលវិញ។​

លោក មឿន តុលា នាយកប្រតិបត្តិអង្គការ CENTRAL បានច្រានចោលការចោទប្រកាន់នេះ ដោយនិយាយថាពួកគេមិនដែលញុះញង់នរណាម្នាក់ឱ្យបង្កើតសហជីពផ្ទាល់ខ្លួនរបស់ពួកគេឡើយ ហើយថែមទាំងមិនដែលបានបណ្តុះបណ្តាលសមាជិកនៃក្រុមសហជីពនិងសហព័ន្ធណាមួយដែលជាហត្ថលេខីក្នុងចំណោមក្រុមហត្ថលេខីទាំង ២០០ នោះដែរ។

លោក​ថ្លែង​ថា​៖ «​យើង​មិន​មាន​គោលការណ៍​បំបែក​សហជីព​ទេ ដូច្នេះ​ការ​ចោទ​ប្រកាន់​គឺ​ខុស​ទាំង​ស្រុង»។

លោក​បាន​មាន​ប្រសាសន៍បន្ត​ថា៖ «យើង​មិន​ធ្វើ​ការ​ជាមួយ​សហជីព​ដែល​ស្ថិត​ក្រោម​ឥទ្ធិពល​របស់​គណបក្ស​នយោបាយ [CPP] ទេ ដូច្នេះ​ក្រោមហេតុផលហ្នឹង​យើង​គ្មាន​គម្រោង និង​សកម្មភាព​ដើម្បី​ធ្វើ​ការ​ជាមួយ​សហជីព​ទាំង​នោះ​ទេ»។

លោកបានកត់សម្គាល់ថា ការចោទប្រកាន់នេះធ្វើឡើងដោយសហជីពដែលមានសម្ព័ន្ធភាពជាមួយគណបក្សប្រជាជនតែប៉ុណ្ណោះ ហើយធ្វើឡើងក្រោមហេតុផលនយោបាយ និងមានបំណងបង្អាក់ការងាររបស់អង្គការឯករាជ្យដែលការពារសិទ្ធិ។​

 លោក តុលា បាន​ថ្លែង​ថា​៖ «​ការ​ចោទ​ប្រកាន់​ថា​បុគ្គលិក​នៅ​ CENTRAL ថា​បាន​បញ្ចុះបញ្ចូល​សមាជិក​របស់​ពួកគេ​ឱ្យបង្កើត​សហជីព​ថ្មី​មួយ​ ខ្ញុំ​​រក​ឃើញ​ថាគ្មានអ្វី​ពិត​នៅ​ក្នុង​នោះ​ទេ»។

លោក​បាន​មាន​ប្រសាសន៍​ថា៖ «ខ្ញុំ​បាន​មើល​ឃើញ​ថា​វា​មាន​ចេតនា​ជា​កលល្បិច​នយោបាយ​ដើម្បី​គំរាម​កំហែង និង​ធ្វើ​ទុក្ខបុកម្នេញ​ដល់​អង្គការ និង​សមាគម​ដែល​បាន​ធ្វើ​ការ​ដើម្បី​បម្រើ​សង្គម និង​ផលប្រយោជន៍​កម្មករ និង​ការ​ការពារ​សិទ្ធិ​មនុស្ស»។​

ជាមួយគ្នានេះ សារព័ត៌មាន Fresh News បានចុះផ្សាយអត្ថបទមួយកាលពីថ្ងៃព្រហស្បតិ៍ថា យុទ្ធសាស្ត្រដែលមានចែងក្នុងលិខិតរបស់សហជីពដែលបានចុះហត្ថលេខានោះ គឺដូចគ្នាទៅនឹងការប្រើប្រាស់ដោយលោក កឹម សុខា ដែលបង្កើតក្រុមអង្គការសិទ្ធិមនុស្ស CCHR គណបក្សសិទ្ធិមនុស្ស និងគណបក្សសង្គ្រោះជាតិ ដែល​អត្ថបទ​អះអាង​ថាជាយុទ្ធសាស្រ្ត​​ក្នុងការព្យាយាម​បង្កើត​បដិវត្តន៍​ពណ៌។

អត្ថបទនេះក៏បានអះអាងដែរថា CENTRAL កំពុងជួយកូដករណាហ្គាវើលដ៍ ទទួលបានមូលនិធិពីប្រភពផ្សេងៗ។

មន្ត្រីតុលាការបាននិយាយថា កាលពីសប្តាហ៍មុន តុលាការក្រុងភ្នំពេញបានបញ្ជូន កញ្ញា ឈឹម ស៊ីថរ ប្រធានសហជីពណាហ្គាវើលដ៍ទៅឃុំខ្លួនបណ្តោះអាសន្ន ដោយចោទថាអ្នកស្រីបានបំពានលក្ខខណ្ឌនៃការត្រួតពិនិត្យតាមផ្លូវច្បាប់របស់តុលាការ។

កញ្ញា ស៊ីថរ ដែល​ជា​ប្រធាន​សហភាព​គាំទ្រ​សិទ្ធិ​ការងារ ត្រូវ​បាន​ចាប់​ខ្លួន​កាល​ពី​ថ្ងៃ​សៅរ៍ នៅ​អាកាសយានដ្ឋាន​អន្តរជាតិ​ភ្នំពេញ បន្ទាប់​ពី​ត្រឡប់​មក​ពី​សន្និសីទ​ការងារ​ក្នុង​ប្រទេស​អូស្ត្រាលី។

កញ្ញា ស៊ីថរ ត្រូវ​បាន​ចាប់​ខ្លួន​ដំបូង​កាលពី​ខែ​មករា ហើយ​ត្រូវ​បាន​ដោះលែង​ឱ្យ​នៅ​ក្រៅ​ឃុំ​ក្នុង​ខែ​មីនា។​ កញ្ញានិងមេដឹកនាំសហជីពចំនួនប្រាំពីរផ្សេងទៀត ប្រឈមមុខនឹងការចោទប្រកាន់ពីបទញុះញង់ ពាក់ព័ន្ធនឹងការតវ៉ារបស់អតីតបុគ្គលណាហ្គាវើលដ៍ ដែលបានបន្តចាប់តាំងពីការបញ្ឈប់ការងារទ្រង់ទ្រាយធំក្នុងឆ្នាំ២០២១។មេដឹកនាំ​សហជីព​ឯករាជ្យ​បាន​និយាយ​ថាពួកគេ​ជឿ​ថាខ្លឹមសារនៃ​ការចុះផ្សាយ​របស់​ប្រព័ន្ធ​ផ្សព្វផ្សាយ និង​ញត្តិ​តវ៉ា​មិនមានភាពត្រឹមត្រូវនោះទេ។​

លោក អាត់ ធន់ ប្រធាន​សហភាព​ការងារ​កម្ពុជា​បាន​ថ្លែង​ថា លោក​ជឿ​ថា ការ​ចោទ​ប្រកាន់​មក​លើ CENTRAL គឺ​ពាក់ព័ន្ធ​នឹង​ការ​តស៊ូ​មតិ​ក្នុង​នាម​កម្មករ​ណាហ្គាវើលដ៍​ធ្វើ​កូដកម្ម។

លោក​បាន​ថ្លែង​ថា​៖ «​ទី​មួយ​ខ្ញុំ​គិត​ថា​វា​ទាក់ទង​នឹង​ការ​គាំទ្រ​ក្នុង​ការ​តស៊ូ​មតិ​របស់​បុគ្គលិក​ណាហ្គា​វើ​លដ៍ និង​ទី​ពីរ​ដោយសារ​ CENTRAL ​មាន​សកម្មភាព​ខ្លះ​ទាក់ទង​នឹង​សមាជិក​សហជីព​»។

លោកមាន​ប្រសាសន៍បន្ថែម​ថា៖ «តាម​ទស្សនៈ​របស់​ខ្ញុំ អង្គការ​គួរ​អនុវត្ត​ការងារ​របស់​ខ្លួន​ទាក់​ទង​នឹង​ការងារ​អង្គការ ដូច​ជា​ការ​ផ្តល់​ជំនួយ​ផ្នែក​ច្បាប់ ប៉ុន្តែ​សកម្មភាព​ប្រមូល​និង​ជូន​ដំណឹង​ដល់​សមាជិក [សហជីព] អនុញ្ញាត​ឱ្យ​សហជីព​ធ្វើ​ជំនួស​វិញ»។

អ្នកស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា​បាន​ថ្លែង​ថាសកម្មភាព​ដែល​នាំ​ឱ្យ​មាន​ញត្តិ​បែប​នេះ​មិន​អាច​កើត​ឡើង​បាន​ទេ បើ​គ្មាន​ការ​ជ្រោមជ្រែង​ពី​អ្នក​កាន់​អំណាច។

អ្នក​ស្រី​បន្ត​ថា​៖ «​ហើយ​ប្រសិន​បើ​ពួក​គេ​មាន​ភស្តុតាង​ត្រឹម​ត្រូវ​ដូច​ខ្ញុំ​បាន​និយាយ​ខាង​ដើម  ​​បើ​មាន​ភស្តុតាង​ត្រឹម​ត្រូវ​វា​មែន វាប្រាកដជាដឹងច្បាស់ហើយថាតើក្រុមហ៊ុនណាដែលស្ថាប័នទាំងពីរនេះបានញុះញង់»។​

អ្នកស្រីបានបន្តថា៖ «ពួកគេ​មិន​មែន​ជា​សហជីព​ឯករាជ្យ​ការពារ​សិទ្ធិ​កម្មករ​ទេ ពួកគេ​ជា​សហជីព​ដែល​គាំទ្រ​ផលប្រយោជន៍​របស់​និយោជក ឬ​រដ្ឋាភិបាល​ និយាយឱ្យ​ត្រង់ទៅ។ ​កន្លង​មក​ការងារ​របស់​ពួក​គេ​មិន​ដែល​ជួយ​ដល់ [កម្មករ] នោះ​ទេ»

អ្នកស្រី អ៊ូ ទេព ផល្លីន ប្រធាន​សហព័ន្ធ​កម្មករ​អាហារ​និង​សេវាកម្ម​កម្ពុជា​បាន​មាន​ប្រសាសន៍​ថា អ្នក​ពាក់​ព័ន្ធ​នឹង​ការ​ការពារ​សិទ្ធិ​កម្មករ​តែង​រង​ការ​យាយី​បែប​នេះ។

អ្នកស្រីបាននិយាយថា៖«សម្រាប់ពួកយើង យើងមិនភ្ញាក់ផ្អើលទេ។ ព្រោះ​យើង​ការពារ​សិទ្ធិ​កម្មករ យើង​ត្រូវ​រង​ទុក្ខ​ពី​អ្នក​ដែល​មិន​សប្បាយ​ចិត្ត ព្រោះ​យើង​ទៅ​ឆក់​យក​ផលប្រយោជន៍​គេ។ យើង​នឹង​បង្កើន​អំណាច​កម្មករ»។

លោក អំ សំអាត នាយកចាត់ការទូទៅ​នៃ​អង្គការ​លីកាដូ បាន​ជំរុញ​ឱ្យសហជីព និង​សហព័ន្ធ​ស្វែងរក​ដំណោះស្រាយ​ដោយ​សន្តិវិធី និង​ចៀសវាង​ការ​ចាត់​វិធានការ​ផ្លូវ​ច្បាប់។

លោក​បាន​មាន​ប្រសាសន៍​ថា៖ «វា​មិន​មែន​ជា​វិធី​ត្រឹម​ត្រូវ​ក្នុង​ការ​ដាក់សម្ពាធអ្នក​ដែល​ធ្វើ​ការ​បម្រើ​ផល​ប្រយោជន៍​កម្មករ… សាធារណជន​នឹង​មើល​ឃើញ​ពីរូបភាព​​មិនល្អនៃ​សម្ព័ន្ធភាព​រវាង​មនុស្ស​ដែល​បាន​ធ្វើ​ការ​បម្រើ​សង្គម​ក្នុង​នាម​ជា​សហជីព និងអង្គការ»។

លោក William Conklin នាយកប្រតិបត្តិអង្គការ ACILS មិនអាចទាក់ទងសុំការអត្ថាធិប្បាយបានទេ៕​

ប្រែសម្រួលពីអត្ថបទភាសាអង់គ្លេស៖ With Vague Details, Pro-government Unions Accuse Labor Groups of Inciting Members to Form New Union

604 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម