អង្គភាពប្រឆាំងអំពើពុករលួយ (ACU) នៅថ្ងៃទី៣ ខែកក្កដា បើកការស៊ើបអង្កេតលោក ស៊ាន បូរ៉ាត រដ្ឋលេខាធិការក្រសួងអប់រំ និងជាអនុប្រធានអង្គភាពប្រឆាំងអំពើពុករលួយ និងលោក ស ថាវី អនុរដ្ឋលេខាធិការក្រសួងការពារជាតិ ពាក់ព័ន្ធជាមួយសំណុំរឿងអតីតឧកញ៉ា ឡេង ចាន់ណា ដែលបានបោកប្រាស់ប្រជាពលរដ្ឋរាប់ពាន់នាក់ និងអស់ទឹកបា្រក់រាប់លានដុល្លារ។
យោងតាមការស៊ើបអង្កេតផ្ទៃក្នុងរបស់អង្គភាពប្រឆាំងអំពើពុករលួយ លោក ស៊ាន បូរ៉ាត់ និងលោក ស ថាវី បានជាប់ពាក់ព័ន្ធនឹងសំណុំរឿងជាមួយអតីតឧកញ៉ា ឡេង ចាន់ណា ករណីឆបោកទ្រង់ទ្រាយធំនៅខេត្តកំពង់ធំ និងខេត្តសៀមរាប ដែលមានអ្នកចាញ់បោករាប់ពាន់នាក់ និងគិតជាទឹកប្រាក់រាប់លានដុល្លារ។
នៅក្នុងសំណុំរឿងបើកការស៊ើបអង្កេតរបស់អង្គភាពប្រឆាំងអំពើពុករលួយលើ ស៊ាន បូរ៉ាត និងស ថាវី នេះ អ្នកទាំងពីរមិនមែនជាសាក្សីទេ គឺជាជនសង្ស័យនៃសំណុំរឿង។
សូមបញ្ជាក់ថា ស្របជាមួយគ្នានេះតុលាការខេត្តសៀមរាប ក៏បានបញ្ជូនសំណុំរឿងករណីអតីតឧកញ៉ាគឺអ្នកស្រី ឡេង ចាន់ណា និងបក្ខពួកចំនួន៣២ សំណុំរឿងមកអង្គភាពប្រឆាំងអំពើពុករលួយផងដែរ ហើយតុលាការបានខិតខំធ្វើការយ៉ាងម៉ត់ចត់អស់រយៈពេលជិតពីរឆ្នាំមកនេះ។
សំណុំរឿងទាំង៣២នេះ មានទាំងអស់ ២៤ ៨៥២ទំព័រ (អង្គភាពចាត់មន្ត្រី១០រូបអានឯកសារទាំងនេះមួយខែបានចប់) ហើយតួអង្គ ស៊ាន បូរ៉ាត និង ស ថាវី នៅដំណាក់កាលតុលាការខេត្តសៀមរាបគឺជាសាក្សី។
កាលពីខែធ្នូ ឆ្នាំ២០២៤ លោក បូរ៉ាត និងលោក ថាវី ត្រូវបានសាលាដំបូងខេត្តសៀមរាបសាកសួរក្នុងនាមជាសាក្សីនៅក្នុងសំណុំរឿងគម្រោងវិនិយោគដីធ្លីក្លែងបន្លំដែលបានឆបោកលុយជាង២០០លានដុល្លា បន្ទាប់ពីប្រជាពលរដ្ឋរាប់ពាន់គ្រួសារនៅក្នុងខេត្តសៀមរាបបានបាត់បង់ប្រាក់យ៉ាងច្រើននៅក្នុងគម្រោងអចលនទ្រព្យរបស់ក្រុមហ៊ុន ប្រ៊ីលាន ស៊ីធី ឬអំពីភាគលាភខ្ពស់របស់ខ្លួន។
អគ្គនាយិកាក្រុមហ៊ុន អ្នកស្រី ឡេង ចាន់ណា ត្រូវបានចាប់ខ្លួនកាលពីខែមីនា បន្ទាប់ពីពលរដ្ឋរាប់ពាន់គ្រួសារនៅខេត្តសៀមរាប រួមទាំងបុគ្គលិកកម្ពុជាជាង100នាក់ដែលធ្វើការនៅប្រទេសកូរ៉េ បានបាត់បង់ការវិនិយោគយ៉ាងច្រើននៅក្នុងការបោកប្រាស់ «គ្រោងការណ៍ភាគលាភខ្ពស់» ក្នុងរយៈពេលពីរឆ្នាំកន្លងមកនេះ។
លោក គី តិច ប្រធានក្រុមមេធាវីរបស់រដ្ឋាភិបាល បានថ្លែងក្នុងសន្និសីទសារព័ត៌មានកាលពីខែតុលា ឆ្នាំ២០២៤ ដែលបង្ហោះលើ Freshnews លោកមានប្រសាសន៍ថា មានជនរងគ្រោះចំនួន ៤ ៩២៩នាក់ ដែលស្ម័គ្រចិត្តស្នើសុំមេធាវីដើម្បីការពារសំណុំរឿងរបស់ពួកគេ។ ចំណែកពលករនៅបរទេសវិញ ក្រុមការងារលោកកំពុងចាត់ការតាមនីតិវិធី។
ការបង្រ្កាបនេះហាក់ដូចជាផ្នែកនៃយុទ្ធនាការរបស់រដ្ឋាភិបាលដើម្បីបង្ហាញពីរូបភាពនៃអភិបាលកិច្ចល្អ ចំពេលមានការខកចិត្តកាន់តែខ្លាំងឡើងជាមួយនឹងភាពល្បីល្បាញថ្នាក់ឧកញ៉ាចំពោះការរំលោភដីធ្លី និងការលាងលុយ។ អ្នកសង្កេតការណ៍អន្តរជាតិបានកត់សម្គាល់នៅពេលចាប់ផ្តើមនៃករណីនេះ។
រឿងអាស្រូវក្លែងបន្លំបានជាប់ពាក់ព័ន្ធនឹងឥស្សរជនកម្ពុជាដ៏លេចធ្លោក្នុងប៉ុន្មានឆ្នាំថ្មីៗនេះ ជាមួយនឹងរាប់រយគ្រួសារដែលដាក់ពាក្យបណ្តឹងចោទប្រកាន់ការក្លែងបន្លំដីធ្លី ដែលមួយក្នុងចំណោមពួកគេប្រឆាំងនឹងឧកញ៉ា ហ៊ី គឹមហុង។
បុគ្គលចំនួន៥នាក់ រួមទាំងមន្ត្រីជាន់ខ្ពស់រដ្ឋាភិបាល អ្នកជំនួញ និងមេធាវីម្នាក់ ត្រូវបានចោទប្រកាន់ពីបទពុករលួយ និងការក្លែងបន្លំ ដែលស្ទើរតែទាំងអស់ក្នុងចំណោមនោះត្រូវបានចាប់ខ្លួន ពាក់ព័ន្ធនឹងការកាត់ទោសដាក់ពន្ធនាគារអតីតជំនួយការពីររូបរបស់ប្រធានព្រឹទ្ធសភា លោក ហ៊ុន សែន គឺលោក លី សាម៉េត និងលោក ដួង តារា។ យោងតាមដីការបស់សាលាដំបូងរាជធានីភ្នំពេញ។
ការចាប់ខ្លួនចុងក្រោយ រួមមាន អាជីវករត្បូង និងសំណង់ លោក អ៊ុត ធី អតីតមន្ត្រីនគរបាលជាតិ លោក មួង ឃីម អភិបាលរងខេត្តពោធិ៍សាត់ លោក ឡាយ វិសិដ្ឋ អតីតអភិបាលស្រុកល្វាឯម ខេត្តកណ្តាល លោក ខន សុខគា និងលោកមេធាវី ឡាច សំរោង ដែលបច្ចុប្បន្នកំពុងគេចខ្លួន៕
